الخميس، 4 أبريل، 2013

Back :)

ان شاء الله هبدأ من تاني هنا 

انقطعت بقالي فتره بس بحضر حاليا لمقال من كتابتي مش ترجمه 

ارجو لو فيه اي اقتراحات تتفضلوا :)

الاثنين، 2 يوليو، 2012

15 شئ لو اتنازلنا عنهم هنكون اسعد بكتير



احنا للأسف بنتمسك بحاجات كتير أوي بتخلينا دايما زي اللي متعاقدين مع الالم والتوتر والضغط , وبدل ما نتخلص منهم ونسمح لنفسنا اننا نكون اكثر سعاده واقل توتر , احنا بنتمسك بيهم أكتر
لكن على مين :D  من دلوقي هنبدأ بخطوات عمليه ونسمح لنفسنا اننا نتغير - للأفضل طبعا – وأول خطوه عمليه اننا نتعرف على الحاجات اللي المفروض نتخلص منها
ها ... جاهزين ؟
Here we gooooooo ;)




1-      اتخلى عن حاجتك انك تكون دايما صح

كتير أوي منا مش بيطيق فكرة انه ممكن يبقا غلط حتى لو كان بكده بيخاطر بعلاقات عظيمه في حياته او بيتسبب لنفسه بكمية ألم لا تطاق . عشان ايه ؟؟ فعلا مفيش حاجه تستاهل ده كله :)
كل ما تلاقي نفسك على وشك تدخل خناقه عشان تثبت انك صح اسأل نفسك سؤال " هل من الممكن أكون – نوعا ما –  صح ؟ هل ممكن أكون مؤدب شويه في حواري ؟
حط احتمالات انك ممكن تكون خطأ لان كلنا بشر ... ماتبقاش مغرور كده !!!


2-      اتخلى عن احتياجك للتحكم

عايزين دلوقتي نعتزم اننا هنتخلص من حبنا للتحكم في كل شئ بيحصلنا او بيحصل حوالينا سوء مواقف , أحداث أو أشخاص ... الخ .سواء كانوا اشخاص بنحبهم او زملااء عمل  او ناس غريبه بنقابلها في الشارع . فقط اسمح لأي شئ بيحصل انه يحصل وهتشوف اد ايه ده هيأثر على أعصابك وهدوءك . بي كووول يا مااان 
By letting it go it all gets done. The world is won by those who let it go. But when you try and try. The world is beyond winning.” Lao Tzu


3-      اتخلى عن اللوم

لازم نتخلى عن حاجتنا اننا نلوم غيرنا على أي حاجه بتحصل , اي حاجه بنحسها . لازم نعمل ستووووب لاهدار طاقتنا على حاجات متستحقش . بمعنى أصح لازم نتحمل مسئولية حياتنا لأنها مش مسئولية أي حد غيرنا .


4-      اتخلى عن الهواجس والتفكير السلبي

أد ايه منا بيجرح نفسه كل يوم بانتقاده لنفسه واتهامها بالعجز وهيا اصلا ملهاش ذنب ده ذنب التفكير السلبي اللي جوا كل واحد منا واللي بنديله مساحه كبيره اوي من تفكيرنا . متصدقش كل حاجه بيقولك عليها عقلك وخصوصا لو كانت سلبيه وبترجعك لورا . انت احسن من كده بكتير .
The mind is a superb instrument if used rightly. Used wrongly, however, it becomes very destructive.” Eckhart Tolle


5-      اتخلى عن وضع حدود لاعتقاداتك

عن اللي أقدر اعمله واللي مش هقدر , عن الممكن والمستحيل . من هنا ورايح مش هتسمح لاعتقاداتك انها تحبسك في المكان الغلط . افرد جناحاتك وطييييييير ;)
A belief is not an idea held by the mind, it is an idea that holds the mind” Elly Roselle



6-      اتخلى عن الشكوى

كفايه بقا شكوى من الكتير الكتير الكتيييير أوي – مع ايموشن سخريه مني – اللي بيحصلك والناس واللي بيعملوه فيك . مفيش حد يقدر يعمل حاجه تضايقك غير بمساعدتك . انت اللي بتسمح لأي حد أو أي حاجه انها تؤلمك وتخليك تعيس . مش المواقف هيا اللي بتخليك تعيس انما نظرتك للمواقف هيا اللي بتتحكم ازاي هتحس بعدها . واياك اياااااك تستخف بقيمة التفكير الايجابي ... ها ؟  O_o


7-      اتخلى عن استمتاعك بانتقاد اللي حواليك

لازم تبطل تنتقد اللي حواليك . سواء الأشخاص , الأحداث أو الأشياء الغريبه عنك او اللي انت مش فاهمها – متتفزلكش يعني :D -  كل واحد فينا فيه حاجه مختلفه عن التانيين وفي نفس الوقت كلنا متشابهين في البعض الاخر . كلنا عاوزين نبقا سعداء . كلنا عاوزين نحب ونتحب وكلناا عاوزين نبقا مفهومين . كلنا عاوزين حاجه ما , وفيه حاجه الكل بيتمناها .


8-      اتخلى عن حاجتك لإبهار غيرك      

كفايه بقا بذل جهد فوق طاقتك عشان تبقا حد غيرك عشان تعجب الناس . مش هتتحب بالطريقه دي . اللحظه اللي هتبطل فيها الجهد الجبار اللي بتبذله في الاصطناع  , اللحظه اللي هتخلع فيها كل ماسكاتك , اللحظه اللي هتقبل فيها نفسك الحقيقيه وكمان تثني عليها .... هيا اللحظه اللي هتعرف فيها يعني ايه الناس تحبك , تحبك بجد .


9-      اتخلى عن مقاومتك للتغيير

التغيير حاجه كويسه . أه والله :D . التغيير هيساعدك انك تتحرك من أ لـ ب . التغيير هيساعدك انك تطور حياتك وكمان حياة اللي حواليك . احضن التغيير وقولله يااااا ويلكم ;)
Follow your bliss and the universe will open doors for you where there were only walls” Joseph Campbell


10-  اتخلى عن رفضك لكل حاجه غريبه او جديده

مش كل شويه تفضل توصف أي حد بيعمل حاجه جديده انه معتوه او غريب . حاول توسع نطاق مخيخك وتقبل كل شئ جديد وافهمه حبه حبه . هوا المخ شغال كده .
 “The highest form of ignorance is when you reject something you don’t know anything about.” Wayne Dyer


11-  اتخلى عن خوفك

الخوف ما هو الا وهم . فعلا الخوف اصلا مش موجود على ارض الواقع – انت اللي خلقته . كل حاجه جوا مخك وبس . صلح بقا يا معلم اللي جوا واللي بره هيمشي زي مانت عاوز واحسن كمان
The only thing we have to fear, is fear itself.” Franklin D. Roosevelt


12-  اتخلى عن الاعذار

ارميهم ورا ضهرك او احرقهم . انت معدتش محتاجهم . كتير اوي احنا بنعوق نفسنا بسبب  أعذار كتير بنستخدمها . وبدل ما ننمي نفسنا ونبنيها . احنا بنحشر نفسنا في بؤرة الاعذار الوهميه اللي بنكدب بيها على نفسنا.


13-  اتخلى عن الماضي

عارفه عارفه . هتقولولي صعب . وخصوصا لما يكون الماضي شكله احسن بكتيييير من الحاضر الواقعي المرير و المستقبل اللي كله خوف وغموض . بس لازم تعرف حاجه مهمه ان الحاضر هوا الحاجه الوحيده اللي بتملكها دلوقتي والماضي حاليا ما هو الا احلام وذكريات بنشتاقلها وبس . والماضي انت تجاهلته من لحظة ما تم وصفه بـ ماضي . توقف بقا عن خداع نفسك . كن الحاضر في كل شئ بتعمله واستمتع بحياتك . وبالرغم من كل شئ الحياه رحله مش مصير . خلي عندك رؤيه مستقبليه . خليك مستعد بس دايما كن الحاضر في الوقت الحالي .


14-  اتخلى عن التبعيه

اهو ده بقا مشكلتي انا اللي ما زالت قائمه ولكن احب أأكد انها مع الوقت بتقل وتقل وتقل لكن لازم نمارس طرق التخلص منها
في اللحظه اللي هتجرد نفسك من كل شئ ومن كل الاشخاص وتبقا مستقل بذاتك صدقني كمية ثقه هتحس بيها تستحق انك تسعى عشان تحسها وهتبقا قادر انك تفهم كل شئ حواليك من غير حتى ما تحاول .
احب اوضح حاجه بس ان تخلصك من تبعيتك للأشخاص اللي حواليك مش معناه كراهيتهم او عدم اعتمادك عليهم بالمره بالعكس الانسان مش هيقدر يعيش لوحده اللي اقصده ان في بعض المهمات اللي لازم تقوم بيها لوحدك وتعتمد على نفسك وبس لو انت دايما متعود انك تشارك حد مش هتقدر ابدا انك تتحمل مسئوليتها .


15-  اتخلى عن انك تعيش حياتك بناءا على توقعات اللي حواليك

كتير اوي منا بيعيش حياته مش زي ما هو عاوز . بيعيشوها بناءا على اللي غيره بيعتقد انه الافضل ليه . بيهملو ويهمشو صوتهم الداخلي اللي بينادي جواهم بكل وضوح . دايما مشغولين انهم يسعدو اللي حواليهم . معندهمش كنترول على حياتهم ودايما ناسيين نفسهم . اسمحلي اقولك انك لو بتعمل كده فـ انت معندكش حياه . لكن بعد اللحظه دي لازم تعيش حياتك بجد . اصلها واحده يعني مش خمسين . متخليش آراء الناس تلخبطك وتمشيك يمين وشمال وفوق وتحت بعيد عن المسار بتاعك

تم بحمد الله :) 
المصدر هنا

اتمني يكون المقال عجبكم وأفادكم
للاشتراك في تيم العمل يرجى المراسله على ايميل المدونه karakeb
تحياتي
أميره يوسف


الأربعاء، 14 سبتمبر، 2011

8 طرق ل ثقه أكثر : عيش الحياه اللي في أحلامك






“مع ادراك المرء لمقدرته وثقته بنفسه يكون في مقدوره ان يبني عالم افضل “  ~Dalai Lama

زمان وانا صغيره كانت احلامي كتيره ملهاش حصر …. وكنت بسأل كتير اوي عن كل حاجه … كان ممكن تحس فيا اني ممكن ابقا حاجه

طبيعي بدأت اكبر واواجه صعوبات كتير ومن غير ما اخد بالي معملتش حساب العزيمه اللي عماله تقل والاحلام اللي ملامحها ما بقتش واضحه

في كل تجربه بنمر بيها لو خسرنا ومقعدناش مع نفسنا ودوسنا على حتة تشجيع النفس هيبدأ اليأس يتسرب لينا وفكرة مش هقدر هتبدأ تتمحور في تفكيرنا

عشان تواجه الواقع وتغيره محتاج ثقه كبيره اوي في النفس

صاحب المقاله دي كان ليه احلام كتيره اوي لكن اتأخر اوي في البدايه لحد ما بقا عنده 27 سنه وطبعا ندم على تضييع الوقت ده كله وقال :


by Lori Deschene
“ممكن يكون عمرك ما كنت غير متأكد من نفسك أدي . لكن أكيد مريت وهتمر بالشعور ده اللي في بداية كل شئ جديد وهوا (رعب البدايه) وده مفيش منه غير انه بيحد من عزمك وكمان بيقلل من قدرتك على فعل اي تأثير ايجابي في العالم اللي حواليك “

انا مش متأكد اذا كانت الثقه في النفس ممكن نتعلمها

الكاتب سأل السؤال ده على صفحه عالفيس واستعان بالأجوبه ومحور 8 طرق لزيادة الثقه بالنفس … تابع المقال وهيتم ذكرهم ان شاء الله

نبدأ --->

1- استفيد على أد ما تقدر من الثقه اللي اتولدت بيها

“ اشعر بأنها شئ موجود دائما , شئ ولدنا به وضاع على حافة الطريق , او سرقه أحد ما , شئ يجب عليك الحفر عميقا لتجده من جديد “ ~Amy Lee Tempest

اول ما جيت للدنيا جيت بتصرخ هل فكرت كتير تصرخ ولا لا او كنت خايف بعد ما يقطعو الحبل السري يحصلك حاجه ؟؟ لا طبعا انت جيت غير واع للي بيحصل حواليك . مهتم فقط باحتياجاتك الشخصيه وملكش دعوه تماما برأي الناس اللي حواليك طبعا مش معنى كده انك تعزل نفسك عن العالم ده بس تذكير بالثقه اللي انت مولود بيها …

“ لازم تصرخ في احلامك (هحققك) زي ما صرخت للعالم لما اتولدت وقلت انا جيت يا عالم “ ~ أميره

بمجرد ما بتكبر احساس الادراك جواك بيتكون و بيبدأ الشك والتفكير الكتير في ازاي الناس شايفاك ورأيها فيك ايه . وبتتعلم حب المدح واجتناب النقد وممكن تبدأ تحس بالاحباط لو النقد زاد عن المدح

لما تبدأ تحس بانك مش واثق من نفسك وبدأ طريقك يحيرك افتكر الثقه اللي انت مولود بيها وممكن كلنا نتعلم ازاي نسترجعها لما نتعلم اننا نخرس كل الأفكار السلبيه اللي جوانا .


2- اعرف نقاط قوتك ونقاط ضعفك

“ بمجرد أن تعرف من أنت فإنك تكتسب الثقه في قوتك وتتعلم مقاومة ضعفك “ ~ angela   birt

انك تعرف انت مين دي حاجه مش بتحصل بين يوم وليله . حاجه واحده هيا اللي صعب انك تعرفها . انك تعرف اي جزء منك هوا انت وأي جزء هوا اللي المفروض يبقا انت .

وكبداية جيده انت تعرف ضعفك وقوتك وتقارن ده بمتعتك الشخصيه

انت تقعد مع نفسك وتكتب قائمه بخمس حاجات انت جيد في عملها وبتستمتع بيها وقائمه تانيه بخمس حاجات برده بتستمتع بيها بس مش جيد في عملها وتبدأ في تنفيذ حاجه من هنا وحاجه من هنا كده انت بتستخدم قوتك وبتطور ضعفك في نفس الوقت


3- توقع النجاح

ممكن يبقا غريب اني اقول اعتبر انك هتنجح عشان مفيش حد عارف المستقبل بس مش احنار برده دايما بنتوقع الفشل ؟؟ طيب جرب في مره تقول انا هنجح هنجح هنجح

الحكمه التقليديه بتقول انه من الذكاء انك تتوقع الأسوأ عشان لو اتحقق متتصدمش ولو نجحت تقدر تحس بلذة المفاجأه لكن الابحاث بينت ان ده اسلوب غلط . التشاؤم بيقلل من كفائة الأداء وبيكون نبوءه ذاتيه سيئه .

دور عالنجاح كل يوم وهتلاحظ مع الوقت ان نجاحك بيزيد


4- ثق في قدراتك

“ الثقه لا تأتي من معرفة كل شئ ولكن تأتي عندما تتأكد من مقدرتك على ترويض كل ما يواجهك “ ~ Donn King

مفيش حد في الدنيا دي عارف كل شئ . كلنا جيدين في حاجات وسيئين في حاجات تانيه . ما توزنش نجاحك على انت تقدر تعمل ايه او عارف ايه لكن اوزنها على ارادتك وعزيمتك وكثافة التعلم عندك

لو في حد بينتقدك خدها فرصه وطور نفسك . لو في حد أداؤه احسن منك خدها فرصه واتعلم منه . لو قصّرت في مره خدها فرصه وهتقرب من النجاح المره اللي بعدها . متبقاش مجرد واثق في اللي بتعمله كمان خليك واثق في عزمك .


5- احتضن المجهول :

“ الثقه تأتي من مساحة من التواضع . انها تولد عندما يكون لدينا جرأة النظر للعالم من خلال عدسه بديله . وتنمو عندما نمتلك الشجاعه لكي نتبنى تجربه غير معروف نتائجها “ ~ Hana Lee

الناس عادة بيفكرو ان الثقه معناها انك تبقا عارف انك هتطلع بالنتائج المرغوبه من أي عمله بتقوم بيه . لكن الفكره دي مش دائما صحيحه . مش مهم انت أد ايه موهوب او قدرتك أد ايه . انت مش هتقدر تتوقع او تتحكم في كل شئ بيحصل في حياتك .

حتى الناس الواثقين في نفسهم بيخسرو في شغلهم وفي علاقاتهم وكمان في صحتهم .

الثقه بتتكون لما نتأكد من كفائتنا لكن لازم نعترف انها مش وحدها المسئوله عن التحكم في العالم حوالينا . لما تشيل الحمل ده من على كتفك وتتأكد ان بعض التقلبات في حياتنا بيكون سببها مش احنا او تقصيرنا , ساعتها هيكون اسهل بكتير انك تكون واثق من كل خطوه بتخطيها في حياتك .


6- خليك جرئ .. وخاطر

“ الثقه حقا شئ مضحك . تخرج من بيتك وتفعل أكثر شئ يرعبك , وبعد ذلك تجد الثقه تكونت بداخلك “ ~Christopher Kaminski

لو كل يوم بتخرج من بيتك وتعمل نفس اللي بتعمله يوميا اكيد مش هتحس بأي ثقه في نفسك .

لما انتقلت اول مره ل سان فرانسيسكو . كنت مش مآمنه خالص في علاقتي مع الناس . كنت بتنقل كتير وبلف في ارجاء المنطقه عشان اتجنب اني اقرب من حد . وبعد كده تيقنت ان السبيل الوحيد لتحسين علاقاتي مع الناس هو اني ابدأ . مش مشكله لو حصلت فوضى ومنها هتعلم اعمل ايه ومعملش ايه . وفعلا بدأت اتداخل اكتر مع الناس وارتكبت اطنان من الاخطاء لحد ما بقيت عايشه حياة انسانه صح . وصدقوني كانت تستحق كل التعب اللي تعبته .


7- اتعلم ازاي تستقبل الثناء

“ اكتساب الثقة يكون من خلال الاعتراف والتعزيزالإيجابي.” ~Don La Franchi

من العجيب فعلا اد ايه سهل نصدق كل السلبيات اللي بيقولها الناس واد ايه صعب نصدق الايجابيات . انك تستقبل المجاملات ده لوحده فن . ومن الاشياء الغريزيه اننا نفترض ان الناس بتحاول تبقا كويسه معانا او اننا مش جيدين للدرجادي او اننا مجرد محظوظين .

عادة ممكن ده يبقا صح لكن مش هيحصل حاجه لو كسبت من الثناء اللي بتستقبله . ما تاخدش نفسك بعيد وتقنعها ان الكلام ده مجاملات مش اكتر وبدل من ده خدها وحولها لثقه .

الناس بيبقو عاوزينك تنجح ودلوقتي مش مطلوب منك غير انك تصدقهم لما يبينو ليك انك شخص تستحق الثناء .


8- مارس الثقه

“ يمكن مزاولتها . ومع تلك المزاوله سوف تتحسن ثقتك بنفسك “ ~Jacqueline Wolven

زي أي حاجه تانيه في الدنيا ثقتك في نفسك هتتحسن بالممارسه . وفرصه كبيره للممارسه دي لما تقابل ناس جديده . زي ما تكون طالب جديد في مدرسه . مش عندهم فكره انت مين وده معناه انك عندك الفرصه انك توريهم انت مين .

لما تسلم عليهم قدم نفسك . اسمع ليهم لما يتكلمو . لاحظ ايه اللي بيحصل جواك وتفكيرك عامل ازاي . لو بدأت تشك في نفسك استبدل افكارك بغيرها اكثر ثقه . اسأل نفسك الشخص الواثق من نفسه هيعمل ايه لو مكانك . وابدأ في محاكاة اجابتك عن السؤال ده .

لاحظ وضعية جسمك ونغمة صوتك . الوقفه الغلط و الغمغمه اثناء الكلام هتخليك تحس و تبان كشخص غير واثق في نفسك .عشان كده اعدل نفسك بسرعه واتكلم بالراحه وبوضوح .

الناس دايما بتبقا مياله انها تشوفك زي ما انت عاوز تتشاف .


انت ممكن تبقا واثق في نفسك اثناء بعض الافعال وبعضها الاخر لا . ارسم خريطة دماغك وابدأ من الاماكن اللي واثق منها وعليك بيها على الباقي
خليك فاكر دايما انك كائن تقدر وتستحق . ومهما كانت اخطاءك الكل بيغلط واول خطوه هوا الايمان بنفسك وهتوصل لمرحلة عاليه في الثقه في نفسك ان شاء الله


المصدر هنا

تصدقوا الترجمه دي طلعت متعبه اوي :D … يا رب تستفيدو بالبوست زي مانا استفدت
وبأكد لو أي حد عاوز يشارك معايا يبعتلي حاجه زي سي في ليه على ايميل المدونه

تم بحمد الله 

 

السبت، 13 أغسطس، 2011

كبسولة التركيز


98062079
كتير اوي منا بيواجه صعوبه في انه يركز في حاجه معينه سواء كنا بنذاكر او في محاضره او في الشغل
نقص التركيز ده من اكتر عوامل تضييع الوقت في عمل اي حاجه
طيب ايه هوا التركيز اصلا ؟؟
التركيز هوا القدره على توجيه تفكيرك في اي اتجاه انت عاوزه بدون التأثر بأي عوامل تشويش اخرى
كلنا عندنا القدره على التركيز بس النسبه بتختلف من شخص للآخر وكمان بتختلف من شئ لآخر
بمعنى تخيل لو انت هوايتك العزف عالبيانو اكيد مش هتتشتت بسهوله وانت بتعزف لأن الشئ ده مقرب لقلبك
طيب نعمل ايه بقا لو كان الشئ ده يزهأ بسرعه زي المذاكره مثلا
للأسف هنا بيفرض علينا دراسة بعض المواد اللي مش مقربه تماما لقلبنا
والتعليم ده مش موضوعنا حاليا نكتفي ب "استراتيجيات التركيز والتغلب على التشتت "
هنتكلم النهارده عن تلات طرق تعتمد على الممارسه وبنلمس تأثيرها البسيط خلال بعض الأيام والتأثير الكبير هيكون ان شاء الله ما بين اربع وست أسابيع
نبدأ سوا في ممارسة الآتي :-
1- طريقة خليك هنا دلوقتي
2- طريقة العنكبوت
3- وقت القلق/التفكير

 

خليك هنا دلوقتي

دي أكتر طريقه فعاله وبتتلخص في انك كل ما تحس ان ذهنك بيتشتت توجه لنفسك الجمله دي " خليك هنا دلوقتي " وببساطه رجع تفكيرك لمكان ما انت عاوز
وكل ما تحصل كررها انت ممكن تلاقي نفسك اول ما تبدأ الطريقه بتقولها بالمئات خلال الاسبوع الاول ولكن كل فتره هتحس ان المعدل بيقل والفتره ما بين كل مره والتانيه بتطول بس Be patient
في طريقه مشابهه للحكايه دي ولكن غير فعاله بالمره وينصح بعدم استخدامها وهيا بتعتمد على ابعاد حاجه معينه عن تفكيرنا
يعني جرب انك تغمض عينيك وحدد لنفسك كذا حاجه تفكر فيها وبعدها حدد حاجه منهم انك متفكرش فيها لمدة تلات دقايق طبعا صعب جدا
عشان كده اتبع طريقة خليك هنا دلوقتي من غير تحديد حاجه معينه هنبعدها عن دماغنا

طريقة العنكبوت

جرب كده وهات شوكه رنانه وروح جنب شبكة عنكبوت ورنها هتلاحظ ان العنكبوت هيقرب عشان يشوف ايه اللي بيحصل تاني مره هيجي برده تالت رابع خامس لالالالا هيحس بقا ان لا ضرر من الحكايه
طيب ايه علاقة ده بينا احنا كده برده بس العنكبوت اذكى منا لانه ايقن ان الوضع عادي ما يطلبش انه يفضل رايح جاي احنا بقا واحنا في المحاضره حد داخل متأخر نبص عليه حد خارج نبص عليه بلا توقف
عشان نتغلب على المشكله دي ممكن نعتمد على طريقة العنكبوت وهيا اني احاول اوجه تركيزي على الشئ اللي بعمله ومتأثرش بالعوامل الخارجيه وكل ما حاجه تشغلني الجأ كمان ل " خليك هنا دلوقتي "
كمثال للممارسه :
وانت في المحاضره جرب ما تشغلش نفسك بالناس اللي داخله واللي طالعه وابني جسر بينك وبين المحاضر وسيب العالم الباقي طبعا هيبقا صعب في الاول بس بالممارسه صدقني هتلاقي نفسك متنح مع المحاضر
مثال تاني وانت بتكلم حد بص في عينه وركز معاه وملكش دعوه بأي حد تاني هتلاقيك حافظ الحديث كله وسيب العالم الباقي شغال مع نفسه

طريقة وقت القلق / التفكير

ممكن كمان اسميها وقت السرحان والطريقه دي بتتلخص في انك تحدد لنفسك نص ساعه كل يوم تفكر فيها في الهوامش الجانبيه اللي بتشتت التركيز
وانت شغال في الحاجه اللي محتاجه التركيز كل ما دماغك تشت فكر نفسك بوقت السرحان وأجلها والتأجيل احسن من الالغاء يعني سايس افكارك :)
وفي ابحاث علميه تمت على الطريقه دي صدق أو لا تصدق الناس اللي اعتمدت على الطريقه دي قلقهم وتشتيتهم قل بنسبة 35% خلال اربع اسابيع وده طبعا تقدم كبير جدا
خطوات الطريقه :-
1- حدد ميعاد يومي لنفسك تفكر فيه
2- كل ما تشك ان في تشتت داخل عليك فكر نفسك بالوقت ده وانك هتفكر بس مش دلوقتي
3- اهرب من الافكار دي اعتمادا على اول طريقه " خليك هنا دلوقتي "
4- احرص على الميعاد اليومي وما تفوتوش وفكر فيه في كل الافكار اللي بتشوش مخك طول اليوم

بصراحه انا ممن يعانوا من قلة التركيز وضعف الذاكره وما جربتش اني اصلح من نفسي قبل كده كنت مسلمه بالوضع لكن دلوقتي بحاول مع نفسي الحمد لله
وأخيرا ربنا يوفق الجميع ويا رب البوست يعجبكم

البوست مترجم وللاطلاع على الموضوع الاصلي اكليك هنا

الأربعاء، 22 يونيو، 2011

إهداء



إهداء لأكبر كركوبه في حياتي 

وراكي

وراكي 

لحد ما أفهمك