السبت، 13 أغسطس 2011

كبسولة التركيز


98062079
كتير اوي منا بيواجه صعوبه في انه يركز في حاجه معينه سواء كنا بنذاكر او في محاضره او في الشغل
نقص التركيز ده من اكتر عوامل تضييع الوقت في عمل اي حاجه
طيب ايه هوا التركيز اصلا ؟؟
التركيز هوا القدره على توجيه تفكيرك في اي اتجاه انت عاوزه بدون التأثر بأي عوامل تشويش اخرى
كلنا عندنا القدره على التركيز بس النسبه بتختلف من شخص للآخر وكمان بتختلف من شئ لآخر
بمعنى تخيل لو انت هوايتك العزف عالبيانو اكيد مش هتتشتت بسهوله وانت بتعزف لأن الشئ ده مقرب لقلبك
طيب نعمل ايه بقا لو كان الشئ ده يزهأ بسرعه زي المذاكره مثلا
للأسف هنا بيفرض علينا دراسة بعض المواد اللي مش مقربه تماما لقلبنا
والتعليم ده مش موضوعنا حاليا نكتفي ب "استراتيجيات التركيز والتغلب على التشتت "
هنتكلم النهارده عن تلات طرق تعتمد على الممارسه وبنلمس تأثيرها البسيط خلال بعض الأيام والتأثير الكبير هيكون ان شاء الله ما بين اربع وست أسابيع
نبدأ سوا في ممارسة الآتي :-
1- طريقة خليك هنا دلوقتي
2- طريقة العنكبوت
3- وقت القلق/التفكير

 

خليك هنا دلوقتي

دي أكتر طريقه فعاله وبتتلخص في انك كل ما تحس ان ذهنك بيتشتت توجه لنفسك الجمله دي " خليك هنا دلوقتي " وببساطه رجع تفكيرك لمكان ما انت عاوز
وكل ما تحصل كررها انت ممكن تلاقي نفسك اول ما تبدأ الطريقه بتقولها بالمئات خلال الاسبوع الاول ولكن كل فتره هتحس ان المعدل بيقل والفتره ما بين كل مره والتانيه بتطول بس Be patient
في طريقه مشابهه للحكايه دي ولكن غير فعاله بالمره وينصح بعدم استخدامها وهيا بتعتمد على ابعاد حاجه معينه عن تفكيرنا
يعني جرب انك تغمض عينيك وحدد لنفسك كذا حاجه تفكر فيها وبعدها حدد حاجه منهم انك متفكرش فيها لمدة تلات دقايق طبعا صعب جدا
عشان كده اتبع طريقة خليك هنا دلوقتي من غير تحديد حاجه معينه هنبعدها عن دماغنا

طريقة العنكبوت

جرب كده وهات شوكه رنانه وروح جنب شبكة عنكبوت ورنها هتلاحظ ان العنكبوت هيقرب عشان يشوف ايه اللي بيحصل تاني مره هيجي برده تالت رابع خامس لالالالا هيحس بقا ان لا ضرر من الحكايه
طيب ايه علاقة ده بينا احنا كده برده بس العنكبوت اذكى منا لانه ايقن ان الوضع عادي ما يطلبش انه يفضل رايح جاي احنا بقا واحنا في المحاضره حد داخل متأخر نبص عليه حد خارج نبص عليه بلا توقف
عشان نتغلب على المشكله دي ممكن نعتمد على طريقة العنكبوت وهيا اني احاول اوجه تركيزي على الشئ اللي بعمله ومتأثرش بالعوامل الخارجيه وكل ما حاجه تشغلني الجأ كمان ل " خليك هنا دلوقتي "
كمثال للممارسه :
وانت في المحاضره جرب ما تشغلش نفسك بالناس اللي داخله واللي طالعه وابني جسر بينك وبين المحاضر وسيب العالم الباقي طبعا هيبقا صعب في الاول بس بالممارسه صدقني هتلاقي نفسك متنح مع المحاضر
مثال تاني وانت بتكلم حد بص في عينه وركز معاه وملكش دعوه بأي حد تاني هتلاقيك حافظ الحديث كله وسيب العالم الباقي شغال مع نفسه

طريقة وقت القلق / التفكير

ممكن كمان اسميها وقت السرحان والطريقه دي بتتلخص في انك تحدد لنفسك نص ساعه كل يوم تفكر فيها في الهوامش الجانبيه اللي بتشتت التركيز
وانت شغال في الحاجه اللي محتاجه التركيز كل ما دماغك تشت فكر نفسك بوقت السرحان وأجلها والتأجيل احسن من الالغاء يعني سايس افكارك :)
وفي ابحاث علميه تمت على الطريقه دي صدق أو لا تصدق الناس اللي اعتمدت على الطريقه دي قلقهم وتشتيتهم قل بنسبة 35% خلال اربع اسابيع وده طبعا تقدم كبير جدا
خطوات الطريقه :-
1- حدد ميعاد يومي لنفسك تفكر فيه
2- كل ما تشك ان في تشتت داخل عليك فكر نفسك بالوقت ده وانك هتفكر بس مش دلوقتي
3- اهرب من الافكار دي اعتمادا على اول طريقه " خليك هنا دلوقتي "
4- احرص على الميعاد اليومي وما تفوتوش وفكر فيه في كل الافكار اللي بتشوش مخك طول اليوم

بصراحه انا ممن يعانوا من قلة التركيز وضعف الذاكره وما جربتش اني اصلح من نفسي قبل كده كنت مسلمه بالوضع لكن دلوقتي بحاول مع نفسي الحمد لله
وأخيرا ربنا يوفق الجميع ويا رب البوست يعجبكم

البوست مترجم وللاطلاع على الموضوع الاصلي اكليك هنا

هناك 7 تعليقات:

catroz يقول...

البوست دل حلو اوى
بس يا خساره
اان خلاص اتخرجت !! :D

Amira Yusuf يقول...

ربنا يوفقك ممكن يفيدك في شغلك
شكرا على زيارتك :)

سواح في ملك اللــــــــــــــــــه- يقول...

تعرفي

انا مبركزش الا ذا كان الامر اللي قدامي فعلا يحتاج تركيز

يعني في الاحوال العادية

ممكن مثلا اقابل واحد صاحبي راكب عربية

واسلم عليه او نقف نتكلم شوية

بعد اسبوع مثلا ممكن يبقي في ميعاد انا

وصاحبي في مكان ما

فيقوللي هستناك هتلاقي عربيتي مركونة

مثلا جنب محل

ساعتها اساله هي عربيتك نوعها ايه وكان لونها ايه

يستغرب يقولي انت مش شوفتها قبل كده

اقولله اه بس مش فاكرها

بس تعرفي بقي

لو فيه امر يحتاج تركيز

تلاقيني اركز فيه بكل تفاصيله واخرج باحسن نتيجة

د.ريان يقول...

صباح الجمال @mira الراقية

وعيد سعيد للجميع

موضوع رائع وجميل

دمتم بود

نيللي علي يقول...

انا سعيده انى بزور مدونتك لاول مره ويكون ده اول مره اقره لانى فعلا ساعات بكون بفكر فى حاجات وبعدين اتشتت فجاه ..بجد رائع ...ليكى الف تحيه

kmhmhgfd يقول...

تصدق يا حج كامل انا استفـــــــــدت
تسلم ايدك يا ميرا بجد
عجبنى البسيط ده

Amira Yusuf يقول...

اشكركم على التعليق وارجو تكونوا استفدتم فعلا
انتظرونا جاري تحضير البوست القادم